12.09.2010

預支世情


近面書有個巧立名目的活動﹐所有用戶的頭像一律換上了童年時代的卡通人物﹐集體支持國際小童群益。霎時間面書上充斥了叮噹、哈囉吉蒂、變形金剛、一休小和尚、齊天大聖、蠟筆小新……誰換上了什麼樣的卡通人物﹐就像放射性炭測定年一般﹐份屬60/70/80/90年代後﹐霎時無所遁形。因為最少有兩個朋友選擇了叮噹的頭像﹐只好另覓卡通對像。合上眼睛突然定格回到第一套比較有深刻印象的卡通片集﹐於是在網上鍵入《星仔走天涯》﹐找到了合適的頭像。流年似水﹐《星仔走天涯》是《醒目仔時間》的主打頭炮﹐倏忽已是1979年的事兒﹐真是老餅有餅味。

《星仔走天涯》日文原名為《家なき子レミ》﹐即無家可歸的孩子Remi﹐取材自Hector Malot 1878年出版的小說 《Sans famille》。不知道Remi 如何成為星仔﹐然而記得很清楚這是首部立體動畫﹐我和姐姐準點戴上紙製的立體眼鏡﹐透過一紅一藍的玻璃紙﹐依稀看到男主角和雜耍團的小狗猴子在法國郊道上流浪的情境。 主題曲耳熟能詳﹐多年來仍深印腦海﹕

「落雨不怕落雪也不怕﹐
就算寒冷大風雪落下。
能夠見到他﹐可以日日見到佢面﹐
如何大風雪也不怕。 
我要我要找我爸爸﹐
去到那裡也要找我爸爸﹐
我嘅好爸爸未找到﹐
若你見到佢就勸佢回家……」

唱過主題曲無數遍﹐當然那時候不會覺得粵語白話夾雜的歌詞有點彆扭﹐也不會深究路人怎會知道誰是你的爸爸﹐遇上了又如何勸他回家的邏輯。

不太明白東京電影新社那些成年人為什麼選擇把這個故事搬上電視熒幕。也許男主角身世曲折離奇﹐提供了不少感人材料﹐是一坦克車的催淚彈。我相信我沒看畢整套51集的《星仔走天涯》﹐看到中段雜耍團饑寒交迫遇上攔路風雪﹐將軍公主等小狗一一葬身狼腹﹐爺爺犧牲自我好讓星仔不致冷死荒郊﹐已讓才小學一年級的我一下子蒼老了幾十歲。得悉星仔大命不死﹐又有別人幫忙﹐我好像不敢再追看下去。誰知道這些心存好意伸出援手的人會不會被主角孤星入命的腳頭連累﹐本來好好的生活也落得家破人亡。把主角描寫得好像一場瘟疫﹐所到之處﹐途人無一倖免。

發現很多所謂世界名作如《飄零燕》和《萬里尋親記》﹐都愛用上相同的情節﹐孤兒萬里尋親﹐然後在旅途上幾歷人情冷暖離合聚散。至如「好人不一定有好報」的殘酷現實﹐就更在《星仔走天涯》和《義犬報恩》中得到了徹底的發揮﹐教人不寒而慄。

這些世界名作劇場著讓小孩子提前接觸生老病死﹐如一下子從人生銀行預早提取了一大筆經驗的存款﹐是一種蒼涼而突然的揮霍。怪不得還沒有唸完小學﹐我的童真早已透支。

12 comments:

Tat said...

套義犬報恩先最無陰公呢,個爺爺死咗,最後個希望係個畫畫比賽度都無埋,跟住隻狗同男主角都最後凍死埋。

其餘幾套都算ok啦。
萬里尋親記:搵番個老母,只係病咗,失去聯絡
星仔走天涯:又係搵番個親生老母,重好鬼有錢
飄零燕:女主角個有錢小姐朋友對腳好翻

Fun said...

一講呢堆卡通即刻暴露晒年紀 :p

除咗你講呢幾套之外,仲有一套喊到阿媽都唔認得嘅係《小英的故事》!

有無人記得啫?!

Anonymous said...

義犬報恩最後一集我還記得,真的很慘。好似在教堂入面凍死的。

星仔簡直是摧淚彈,一邊吃飯一邊喊。星仔有個細佬的,坐輪椅的。佢阿媽原來是很有錢的。

飄零燕的海迪的朋友搬去山上跟海迪住,有一天,她看見一隻羊沖向她,她嚇到在輪椅站了起來,跟住行得番。

我記得小英的故事呀﹗詳情不記得,只記得又係慘情。

Anonymous said...

忘了講,芳芳當童星時得奬的電影也是改編自星仔的同一個小說的,戲名好像是《孤兒流浪記》。

best actor said...

Tat﹕

義犬報恩係好殘酷o既反面教育﹐如﹕好人無好報﹐畫畫會餓死﹐送牛奶無發達﹐仲被人屈放火等等。當睇到義犬同個o靚仔(好似叫尼路)一齊升天堂果陣﹐我心諗﹕o甘算點﹐安慰獎﹖

萬里尋親同飄零燕的確有大團圓結局﹐不過星仔o既升呢﹐好多人為佢犧牲架。

Fun﹕

小朋友﹐你睇呢D卡通o既時候都未足月﹐點會暴露年紀呢﹐只不過你記性好咋嗎。

《小英的故事》的原著《En famille》都係出自《星仔走天涯》之父 Hector Malot o既手筆﹐梗係喊死人唔洗本啦。

readandeat﹕

我都記得﹐最後一集o靚仔尼路帶住隻狗偷入教堂觀賞魯本斯o既名畫「揚起十字架」﹐然後人狗升天﹐唉。

星媽係有錢架﹐星仔唔係黑得晒。
飄零燕醫腿疾o既方法可以去註冊專利。
芳芳o既《孤兒流浪記》有無粵曲唱﹖。

Fun said...

講開星仔,個副立體眼鏡要買麗的電視週刊先有喎..

其實卡通片就唔駛咁慘囉,放學仲要d小朋友死喊..

btw我今年去上海係買左套包裝非常精美既小英的故事全集,國語配音的 (不過未睇呢)..

best actor said...

fun:

哇﹐我屋企最少買左兩本麗的電視週刊為左副立體眼鏡!

好似機動戰士高達o甘咪好囉﹐搞到生離死別﹐慘到呢。

小英的故事﹐睇過卦但唔記得左......

陶祺生Jerome said...

尼路係抵死的,人地畀野佢食都唔食...(我買了vcd)

best actor said...

JT:

嗟來之食嘛。

naruto said...

我揀味吉陽一,好似後生左一截呀

係呢,其實幾時可以轉番自己個"chok"樣做icon

best actor said...

仲奇怪火影點解唔係火影添~ :o)
過左12月6日﹐你可以變番自已啦。

naruto said...

火影扮火影有乜新奇好玩呢,同埋影響我最大係味吉陽一喎

LinkWithin

Related Posts with Thumbnails